Артиста Никъ

Артиста  Никъ
Фото: serdalo.ru

Дукха ха йоацаш ГIаьбартой-Балкхарой республикерча Султан Ураган яхача иллиалархочунга ладувгIаш вагIаш, цо юха дагайохийтар сона 70-ча шерашка хинна Наьсареи цу ханара цун кагий нахи. ХIара къахьегама ди чакхдаьлча е салоIа ди тIадеча, «Победа» яхача машина чу хайше, салаIа, сакъерда болхар цигара цхьабола кагий нах, къаьстта уж бар завод йолча оагIорахьа баьхараш. Бокъонца наьсархошта юкъе ше хьалкхийча санна да, дискотека хетадаь лакхе хьоахаваьча артиста даьккха илли. Наьсарен юхегIолла тайжа додаш хиннача Алханчуртски канала йистошка нийсвелча, даим а моцагIа укхаза гуш хинна сурт дагадохар сона. IаькъатIе мо йолча гергача ведолгаш тIа шоайла хьерчаш дагIаш хулар, зиракаш мо зIокара шаьрденна бераш. ЦIаьхха, айлора пандара йиш. Ювшар гIараш, Iимад ца йоаккхаш дIатувра шевар. Царна юкъера бIарга ца гуча, массехк пхьагIат миссел мара воацача пандарча кхом боацаш дIадекъар ший оамала а говзала а дошув. Цу кIаьнка ше локхача пандарца йицйора новкъосташта гIаьле, довнаш, латараш, къовсамаш, харцахьа лелар. Ашарий хозача дунен тIа кхувлар цо ший нийсархой. Цу хана аз кхетадицар из, хIанз дIауйла йича хов сона, мел боккха кхетама болх бар, шийна а ца ховш, цо беш хиннар. Ший ашарашца хозадар берий дегашка дIа а чIоагIдеш, вочунна духьаллаттар из.

Кхийнад, дIа-юха дахад цу ханара бераш. Даьсса аллийсад цар шиш беш хинна къух. Дуккхадар дицденнад, бакъда баха бисаб зIамигача пандарчах бола дагалоацам. Са ханага кхаьчача наьсархошта юкъе из ца вовзаш саг наггахьа а хуле тамаш я. Царех дуккхачар тахан а баркал оал цхьан заман чухьа шоашта ашарий хозал а морзал а йовзийтача сага. Заводе баьхача наьха берашта юкъе цIихезараш дар цу хана. ЦаIаш кхыча берех летарца цIихеза дар, вожаш – спортсменаш хиларах, кхоалагIдараш – хьакимий бераш хиларах. ДукхагIбола хьакимаш цу хана укхаза бахар. Бакъда, бе-беча искусствашца бувзам барашта юкъе эггара дукхагIа вовзар Iалихан. Цу хана шоллагIа цIи яр бараша цох тилла. Из яр вайна дика йовзача
М. Ю. Лермонтова «Вай заман турпал» яхача романа тIарча эбарга цIи. Казбич аьлча мара хацар, вувцар малагIа Iалихан ва. Дукха шераш дIадахад цул тIехьагIа, хIанз а кхетаде магац сона цох эбарга цIи хIана тиллаяр. Хетаргахьа, дIатIахьежача сибата тара хийтта хила везаш ва из кинофильма юкъерча эбаргах Из мара кхы бахьан дацар цох из тилла.

Тимурзиев Iалихан ваьв 1958 шера 1-ча апреле Целинограде Iалаудинеи Либеи дезале. Цун вахар атта хиннад оалилга дац. Боккха дезал бар цар хиннар: виъ кIаьнки кхо йиIиги. Iалихан царна юкъе а эггара воккхагIа вар. ШоллагIвола Мухьмад тахан вахаш, болх беш Мочкъий-Юрта ва. КхоалагIвола Муса вай доазув лорадеча эскархошца вар. Бакъда, Онгушта вертолёт эккхаш, хиннача хатара юкъе нийсвенна из, ший тIема декхар дизза кхоачашдеш велар массехк шу хьалха. Мухьмад-Башир ТIой-Юрта вах. Милице болх баьчул тIехьагIа пенсе а ваха, карарча хана университета ха деча нахаца къахьегаш ва. Иштта шоаш маьре бахача тарлуш, шоай дезалаш кхебеш ба йижарий: Нина, Тома, Роза. Вешта аьлча, хьаьналча новкъа болаш хьабаьхкаб уж берригаш а. Цох цецвоалилга а дац, хIана аьлча иштта кхебаьбар уж дас-нанас, хIара дийнахьа яхар санна дикагIдола масалаш гойташ. Дезала да Iалаудин ГI. Ахриева цIерагIча «Электроинструмент» яхача завода котельне болх беш хилар. Либи цу завода сборочни цехе электробурош вIашагIдехкарашца яр.Къахьегама ветеран а яр из. Укхазара енна квартира яр цар Бульварни (хIанз Базоркина) улица тIа. Таханарча дийнахьа Iалаудин а Либи а боацаш ба.

Iалихан дешаш хиннав Наьсарерча интернате.Цул тIехьагIа, номер 1 йолча школе вода из. Цига вахара бахьан дар, Гапархоев Мухьмада кулгал деш, халхара берий ансамбль яр цига вIашагIъелла, цун юкъе хила ловра кIаьнка. Кхыметтел халха бала Iомалурашта пандар локхаш а хулар 10-11 шу даьнна дешархо. Ашарашцара а пандарцара а безам цун дег чу хьахиннабар из зIамига волча хана. ЛерттIа из лакха 1969 шера волавелар Iалихан. Кхы а цхьа шу даьлча пандарчий респбликански яхье хьалхара моттиг а йоаккх цо. Школа яьккхачул тIехьагIа, цхьан юкъа Шолжа-ГIалий тIарча культпросвет училище дешаш хул музыкант, бакъда из дешар чакхдаккхац цо. Заводе болх а бийя, эскаре гIулакх де вода. 1976 шу дар из, Украинерча Полтавски областе кхоач наьсархо, цIермашиннаькъаца дувзаденнача тIема даькъе амал де. Укхаза пандара меттел цунна лу гIишлонхочун балха гIирс. ЗIамига саг ше а вацар пандар лакхара говзал ший йолга дIахайташ. ДIахайтадаларе, сона хеташ, сакъердамегIа-м хургдар цига даьха шераш цунна шийна а цунцарча кагийча наха а. Ши шу ашарий дуненцара хаьда доаккх цо. 1978 шера цигара цIавеча, цхьан хана ше кIеззига болх баьча «Электроинструмент» завода механически цеха слесарь-ремонтник волаш къахьега волалу.юха. Цига воллаше а, культуран цIагIа хиннача Мухаммедов Iаддалий «ТIаргим» яхача халхара коллективе къахьег. Станокаш тоаеш шонкденнача пIелгашта низткъало хулар пандар озабе. Цу хана, цо пандар локхаш, халхабийнарех, хIанз гIорбаьнна артисташ хиннаб. Царех ва «ГIалгIайче» яхача халхара паччахьалкхен ансамбла художественни кулгалхо Гадаборшев Iийса, цу ансамблера халкъа артист Богатырёв Жабраил, керттера балетмейстер Имагожев Адам, кхыбараш.

1982 шера Тимурзиев вода Томск оалача гIалий тIа. ЧIоагIа ловра цунна ше эскаре дIадоладаь гIулакх дIахо дIа а хьош, бокъонца вола гIишлонхо хила. Цу гIулакха чакхъяккха езар институт. Деша отт. Студент везалу хьехархошта а дешача кагирхошта а. Цига дешаш болча вай мехкахоех латта ансамбль вIашагIйолл, цо даим лакха лоаттадора вуза сий, дIа мел яхача хьалхара моттигаш йоахаш. Шин-кхаь шера цига деша ваьгIар зIамига саг. Бакъда боккхача дезалера гIулакхаш ма хетта дика дацар. Дешар дита цIава везача эттар. Денгара ди мел доал, гуш боацача низо юкъ йоллаш латтар цуннеи пандараи юкъе. Дукха ца говш, уж хийра а боах, тIаккха къоаста а бу цо. Ший бера ханара уйла хьийстача мехкал арахьа, кого шаьрданза долча наькъашка гIолла фарал леха вуг из вахаро. 1984 шу. Дона-тIара-Ростов. ЦIенах йолча уйланца вижар гIаттар долаш, гIишлонхочун пхьоал леладеш, укхаза дIаьха итт шу доаккх Iалихана. ЦаI дар тамаш йолаш: пандар боацаш, шийна вIалла дуне а дуалургдац мотташ хиннача цо, из вIалла бе а боллацар хIанз. Маркхалца, остаца оагIув биллача денз, даимленна из бита лаьрхIачох тара дар гIулакх. Мичча беса дале а, цунцара дог-м шелденнадацар. Дукха еза «Казбегера халхара йиш» лакха, каьхата кит йоаттIае мо, пандар озабе ловра. Амма из ер тIакхоачача бацар. Сакъердам кIезига болаш ха яр цо арахьа яьккхар. ХIаьта а вахара Iилма, дунен хIама довзар санна моттиг хилар цох. Ший хьинара таронаш миштай хайра. Байзар къахьегама бокъонца бола чам. Кхыча дешашца аьлча, вахара халонех яьккха ладувгIа йиш мо, цун дег чу яха йисар из зама. Сабар, лоIам безаш моттиг нийсъелча, хьацаро йийхьдаь уж денош тахан а оарцагIдоал Тимурзиевна.

Вича денз морса коч хинна хьийрчаб цох хана лоаттам. Хьалха яйзай деной къахьал, да воацача цIен дукъ. Замано эхкача пунташа мо, дезала юкъе воккхагIа хиларо а, гIа бийхка лелаваьв. Цхьабакъда вахара Iоткъамга ше гоал-м ваккхийтавац. Пандар. Че йиззача дезалца цхьаь йиса нана. ЗIамагIбарий сагото. Воккхачоа а ла хала йола из йист тIаэттача, оатто лехача тоабанца хоавалийтанзар зIамигача сага. Цу хIамаша, хьийна болат санна, чIоагIъеш латтар хургволча артиста оамал. Лай кIалхара тIадувла Iан зиза санна, юкъ-юкъе тоам беш екар керда-керда Iомаю ашараш. Къаьстта а дукха езар Iалихана «Колой КIанта йиш». Халоно хьийшача къонача ший баламах тара хетар цунна багахбувцам тIа вувцача турпала кхел. 1994-ча шера ше кхийнача Наьсаре воагIа из. Дукха ха яцар ГIалгIай Республика кхелла. Мехка хулаш латтар доккхий хувцамаш, хьалъе йолаяьяр гIишлош. Царца кердача заман куц гу цунна. Ишттача хана Даьймехка юхь кIайеш боахкача нахаца хилча бакъахьа вар-кха ше, аьнна, хет Iалихана. ЦIавоагIа. Юха бе болл илдарча пIелгий леламга сатесса улла пандар. ГIалгIай яьннача бокъонна хетаяь хоастама байт санна, бека боал цун кер чура бухбувла муам. Цхьан хана энкарло лаьцача санна, шийла илла хьамсара лаьтта, бIаьстанара гIор еша урд мо, безаме хетар хIанз. Iалихан а пандарца хьакхаштадаьнна цун кулгаш а къаманна эшаргдола ди отташ латтар. Паччахьалкхен филармоне балха дIаэц из юххьанца. Цун говзалах ког-гIортолга еш, къахьега йолалу халкъа инструментий оркестр. Хьалхарча аргIах цунна баркал ала дезаш хIама дар кIоарга чулоацам болча иллеех, ашарех латта репертуар лоаццача хана вIаштIехььялар. Цун дикал ювца вай доале, эггара хьалха белгалдаккха дезарех да, тIема доакъашхошта, спортсменашта, бойла дисача берашта, мугIарерча наха – массарна цхьатарра тоам беш из хилар. Цига халкъа инструментий оркестре болх баь ца Iеш, цо къахьег «Аьрзи» яхача халхара ансамблаца. Цунца дIа-юха ухаш, дукха концерташ тел. Иштта иллиалархошта тIехьа а лекх цо пандар. Цо гIо дора Эсмурзиев Iалаудина, Ахциева Розайна, Барахоева Любайна, кхычарна. Пхийтта шера Iуйрийна оркестрацеи делкъел тIехьагIа ансамблацеи волаш, чакхвоал вай мехкахо. ДIахо из балха хьожаву «ГIалгIайче» яхача халхара тоабаца. Нохч-ГIалгIай, Къилбаседа ХIирий республикай гIоръяьннача артисткас Евлоева Раяс аьнна дешаш дицлуц сона цIаккха: «Шийна тIадилла гIулакх, нийса веце, цул дикагIа кхоачашдеш саг хуле тамаш я. Цунца цхьана пандарчах дахка никъ бола хьисапаш доахкаш, хIамах сакхеташ ва. Ишта саг ше кхача гIертача доазонашка кхача тоам ба».

ВорхI шу да еррига хьаькъала таро, дегIа хьинар мехка долча гIулакха оарцагIдаьккха, кердача моттиге цо болх бу. Цу юкъа ашарашца йолча цун юкъамоттиго наха дицлуш лаьттача халкъа жовхьарашта керда вахар деннад. Довзийтад тIеххьарча заман чухь ашарий дунен тIа хинна хувцамаш. Вахара хозне, бакъдар чIоагIдеш, вай оамалий а гIулакхий а мах беш, да уж. «Дагахьа мел ашараш хов хьона?» — аьнна, хаьттар аз цкъа Iалиханага. Дагадоххарах аьлча, 50-га дIакхоачаш хилар. Къаьстта а лоархIаме да цунна уж дика ховш хилар. Доккхача диканга ваха араваьннача сага оамалца хьалхарча аргIах хила дезар да-кх из. Цудухьа, цо дIадоладаь гIулакх тIехьале беркате йолаш хиларах, вIалла тамаш елга дац. Дуккхача наха мотт, пандар локхача сага къахьегамца сакъердам мара, хало е езаш хIама дац, аьнна. Из ишта дац. Iалихан сона тIеххьара вайнача хана, аьрда кулгал лакхе эзза хьоарчадаь увзорг мо увзалуш дола бинт доаллаш вар. «Кулга фу даьд?» — аьнна хаьттача, цхьа дош доацачох, теркал ца деш дитар цо. ХIаьта а сона хайра, пандар локхаш дIахьекхаденна, кулг лазаш хилар. Вешта аьлча, шонкаш духхьал белаца е ломаца болх беча наха яьнна Iац, уж ювлаш хул артисташта. МоллагIча балха тIа мо, хьаькъалеи хьинареи цхьоагIоно хьалкхоабарех да ашарий элгац. Пандарча ва цунна чухьа гIулакх де, из фусам Iалашъе кхелла цIув. Цун керттера гIулакх – ашараш. Цун дунен назамаш – иллеш. ХIанзарча заман меттаца аьлча, Iалихана локхаш йола хIара йиш хьехархочо луча урокаца, пхьара кхоллача оатхалца нийсъе йиш я. Уж цхьадолча дийнахьа итт а пхийтта а лакха езаш нийслу. Цох хов вайна артиста болх а, моллагIбар санна къахьегам болга. Бале а, халонах ца къахкаш, наьха дегашка ашарий тамагIа дуташ хьавоагIа Iалихан а цун новкъостий а. Из тамагIа да адамашцара безам.

Халхара ансамбле балха веначул тIехьагIа, духхьал пандар лекхача доалаш дац гIулакх. Укхаза кхы а гаьнарча а юхерча а мехкашка гастролашка аха веза. Из а болх ба, из а хало я. Ше ансамбле яьккхача юкъа Iалихан ший новкъосташца хиннав Москве, Казахстане, Испане, Ираке, Иране. Карарча хана уж баха кийчлуш ба Москве, Костроме, Бельге. Цо бу болх атта боацилга хьахайташ да цхьаькха масал а. Ансамбле пандар локхаш, из ше а волаш, верригаш пхи саг ва. Царна юкъе ва халкъа артист Костоев Микаил, вай республикан заслуженни артист Мамилов Назир, Жиани Каха, Маматова Минуси. ХIаьта Iалихан ансамбла музыкальни кулгалхо ва. Дуккхача халхарашта тIехьа пандар локх цар, масала ансамбла репертуаре да гуржий, черсий, эрмалой, нохчий халахараш, кхыдараш. Вешта аьлча, Даькъастен дерригача къамий халахарш да цар дераш. Iалихана, ца баьча балха мах беш, дукха еза цIераш еннай. Эггара хьалха цунна елар «Искусствай гIорваьнна болхло» яха цIи (2002), цул тIехьагIа «ГIалгIай Республикан заслуженни артист» (2006), юххера цунна лу халкъа артиста цIи (2013). Москвера яйта, ДОСААФ 90 шу дизара хетаяь, юбилейца ювзаенна медаль я цун. Культура наха юкъе дIа а йоаржаеш, цу юкъарлонца бакъахьара бувзамаш лоаттадарах еннай из. Тимурзиевс каст-каста дакъа лаьцад цу организаце чакхдоахача вIашагIкхетарашка, дезача деношта хетаяьча моттигашка. Иштта, дика къахьагар, Российски общество чIоагIъяр, къамашта юкъера доттагIал чIоагIдар белгалдоаккхаш, Госдуман депутата, СовгIатех йолча къаман комитета президента В.Черепковс енна медаль а я Iалихана.

Балхаца дувзаденнача гIулакхел совгIа, кхы а дезала дукъ а да цунна тIалатташ. 1994 шера цунна барака чу ваха моттиг еннаяр, тIехьагIа квартира лургья, аьнна. Кхы а ши шу даьлча, цо саг йоалаю. Iалихана фусам-нана я Пхьилекъонгий-Юртара Торшхоева Раисхан. Карарча хана кхо дезалхо ва цар. Беслан Ставрополерча юридически институте дийша вала воалл. ШоллагIвола Рустам Наьсарерча йиълагIча школе иттлагIча классе дешаш ва. «ТIаргим» яхача ансамбле, фатанча волаш, балх а бу цо. ЙиIиг Залина юридически факультете деша а ягIаш, «Строймаркет» яхача тика чу болх беш я. Бакъда ваха моттиг-м хувцаеннаяц артиста а цун дезала а. ВоккхагIволча виIий ткъо шу даьннад. Каста саг йоалае, йиIиг маьре яхийта езаргйолаш да гIулакх, бакъда, бараке вахаш, из мишта дергда ца ховш, йиш еха ва пандарча. Ткъаь кхоъ шу да из 3х4 метр долча цIагIа ваха. Цига ена комисси хиннай, телевидени а хиннай. Iалихана яхачох: «Телевидене Iа аьннар деррига дIаалац. Беш бола болх бувц, эшараш хьоахадац Уж дувца бахьац. ХьатIадоагIача шера пенсе ваха везаш ва. Ишттал ха яьнна саг бараке вах. ДIааьлча эхь дале а, е Iоха е хьалгIатта моттиг яц. 10-15 шера цхьа квартира еннай Имагожев Адама. Ансамбла кхы еннаяц. Филармонена тел цар. Тхона хIама дац, Дала хьакхелла. Кхоана лургья, ломма лургья яхаш, укх ден тIа хьатIакхаьчав со».

Iалихана яхачох, дуккха артисташ ба цар коллективе, баха моттиг йоацаш, кхыметтел царна юкъе ва ансамбла художественни кулгалхо Гадаборшев Iийса ше а. Халкъа артисташ яха цIераш лелаеш а ба царех цхьабараш.

Духхьал болх баь ца Iеш, Тимурзиевс гIо ду вай мехка хьаьший боагIача хана, царна духьалболхача нахаца вахе, арахьара тIабоагIа нах вай къаман IаьдалагIа безбеш, пандар локхаш. Цкъаза, чIоаггIа дехар дийя, кхувл из саг йоагIача, йодача моттигашка ловзар долча. Цхьа хIама да укхаза Iалихана къувлаш, боккхача наха цу тайпарча моттигашка, пардар-фата долаш, халхабоалаш сакъердийтац. Берригаш пандар «дIакъовла» гIерташ хул. Из нийса дац. Цох лаьца дукха дийцад вай къаман цIихезача наха. Ловзар доацаш хилча, сакъердам боацаш хилча, саг йоагIа, йода моттигаш таьзетах тара хул. Цу лостамагIа культура Министерствос укх тIехьарча хана наха юкъе боагIаш бола болх кIезига бу аьнна хеталу. Духхьал мовлат дийшача кхоачам бац цу тайпарча моттигашка. Мовлата, зикара ший никъ ба; беча сакъердама ший никъ ба. Вай къамах болча эздийча къонахаша а тIехьа ловзар увттадаьд шоай коа дика деча. Из вIалла эхь долаш хIама дац. Масала, вай хьалхарча Президента Аушев Руслана саг йоагIача дийнахьа, цун дас Султан-Хьамида, ше халха а воалаш, коа юккъе ловзар оттадайтар. Из нийса а дар.

«ГIалгIайче» яхача халхара ансамбле хинна се дIаводаш, художественни кулгалхочоа Гадаборшев Iийсайна пандарчах фу хет хьежар со.

— Iалихан сона 1979 шера денз вовзаш ва. Художественни самодеятельносте тхона пандар локхаш вар из. Нохч-ГIалгIай республика йолча хана а Наьсаре шиъ мара пандар локхаш саг вацар. Уж бар Евлоева Раяи Тимурзиев Iалихани.Цо музыкальни дешар дийшадац, амма ашарашка ладувгIа хар (музыкальни слух) лакха долаш ва. МоллагIа шийна хьахеза йиш, цу сахьате пандарца дIалакха ховш, йоккха говзал йолаш, къахьега ловш, коллективе эшаш саг ва. Нагахьа санна цун оамалех дувце, бераца, къоаночунца бувца мотт болаш саг ва из. Наха везаш, цар дег тIа бода никъ лаха ховш ва. Бокъонца бакъдар аьлча, Iалихан морг шоллагIвар сона вовзац. Ший болх дукха а безаш, вай культура дIахьалхакхувлаш хьавоагIа из. Ший къам дезаш а, ше гIалгIа волга ше локхача пандарга гIолла хьахайташ а, хьавоагIа, — аьлар Iийсас.

Укхаза массехк дош IотIатоха лов. Сцена тIа арабаьлча санна, хоза дац, атта дац вай халхарчий вахар. Шоай халхараша наха беш бола салоIам цар хьакхолл наб ца еш, готта боахкаш, дезала саготонаш йолаш, къахьегама Iоткъам ловш. ДIахо дIайодача хана, цу новкъа мел нийслу духьаленаш дIаяьнна, шаьра, атта хилба цар вхара никъ. Сона хеташ, сел доккха хIама а дац цар вахар тоадара эшар. Наьха дегаш цар деладеш хилча, цар шоай дегаш а дела бокъо йолаш да аьнна хет сона.

С. Арчаков ,

йоазонхо.

Тимурзиев Iалихана сурт диллар ва художник Б.Даурбеков

Ещё новости о событии:

Дукха ха йоацаш ГIаьбартой-Балкхарой республикерча Султан Ураган яхача иллиалархочунга ладувгIаш вагIаш, цо юха дагайохийтар сона 70-ча шерашка хинна Наьсареи цу ханара цун кагий нахи.
20:12 29.08.2017 Skforussia.Ru - Магас
Артиста  Никъ - Сердало
Дукха ха йоацаш ГIаьбартой-Балкхарой республикерча Султан Ураган яхача иллиалархочунга ладувгIаш вагIаш, цо юха дагайохийтар сона 70-ча шерашка хинна Наьсареи цу ханара цун кагий нахи.
17:52 29.08.2017 Сердало - Магас
 
По теме
Дукха нах баьхаб, хIанз а бах вай мехка, шоай гIулакх тIехьатетташ, мел йоккха хало шоашта хуле а, къаман юкъара гIулакх хьалхадоахаш.
ДIадолалуш да дешара керда шу. МоллагIча сага лов ший бер дика дешаш хилар, цунга гIолла хьаькъал Iомадаь, из вахаре дика дIанийсдалар, атта, хоза ираз долаш дахар.
Дукха ха йоацаш, газето дийцар профессора Дахкильгов ИбрахIима 80 шу дизара хьакъехьа.
(дувцар) Боккхача новкъа а даьнна, баIай босах хьалдийрзар юртара жаIул.
Общероссийское общественное движение «Бессмертный полк России» дал старт творческому конкурсу «Мы этой памяти верны», посвященному незабываемому подвигу солдат Красной армии в годы Великой Отечественной войны — битве за Ржев.
Историки реставрационной компании «АСМ Групп» обнаружили авторские чертежи каменных оборонительных башен Назрановской крепости, сообщили газете «Ингушетия» в пресс-службе организации.
В Государственном музее изобразительных искусств Республики Ингушетия открылась выставка произведений живописи «Вместе с Россией!».
Микаил Гуцериев стал триумфатором Российской национальной музыкальной премии «Виктория», церемония награждения которой состоялась на днях, сообщили газете «Ингушетия» в пресс-службе Министерства культуры республики.
Махмуд-Али Калиматов поздравил военнослужащих и ветеранов управления войск национальной гвардии по региону с профессиональным праздником, сообщили газете «Ингушетия» в пресс-службе Главы и правительства республики.
В ОФСИН России по Республике Ингушетия прошли пожарно-тактические учения - ОФСИН по Республике Ингушетия Сотрудниками ведомственной пожарной охраны ОФСИН России по Республике Ингушетия совместно с работниками пожарно-спасательной части № 4 г. Карабулак МЧС России по региону были проведены занятия,
ОФСИН по Республике Ингушетия
Корь - это острое инфекционное заболевание, характеризующееся общей интоксикацией, воспалительными явлениями со стороны слизистых глаз, носоглотки, верхних дыхательных путей, характерной сыпью.
Роспотребнадзор
В рамках реализации всероссийского проекта «ДоброВСело» врачи Сунженской центральной районной больницы совместно с волонтерами-медиками провели масштабное профилактическое мероприятие в сельских поселениях Чемульга и Аршты.
Газета Ингушетия
photo_5343742741852575501_y (1) - Министерство культуры ГБУ «Филармония им. А. Хамхоева» станет организатором конкурса, в котором могут принять участие все желающие.
Министерство культуры