Цхьан гIалгIай юрта, доккхача тайпан юкъе вахаш хиннав цхьа къонах. Ший кхоачарле йолаш саг хиннавац цун юхе вахаш. Доккхача тайпай кагийча наха къаракъ мел меннача хана вуташ хиннавац ер хьачу а ухаш еппара еш, ер цхаь волдандаь.
Ше фу дергда ца ховш царна садетташ, хала вахаш хиннав из къонах.
Цхьан сарахьа, сесагага аьннад къонахчо:
— Укхазарча вахарах хIама хургдац, воай цIенош дIа а дехка, кхычахьа даха дIадаха деза вай, аьнна. ДIа ца долхе, нахаца довна гIоргда вай.
ТIаккха сесаго аьннад:
— Сона цхьа хIама дагадехад, из вай шинне хьадой цхьаннахьа даха дезаргдац вай. Кхоана Iуйранна вай фу де деза хой хьона, — аьннад сесаго. — Аз керта тIра йовлакх Iо а даьккха, мосаш Iо а хийца цIогIа хьекхаргда, Iалаьлай оарц дала, ювш латт со укх чуваьннача къонахчо яхаш, Iа сона тIехьа а удаш, даьнеи нанеи бехкаш тIехьа топ кхувсаргья сона хьатIа а хьежаеш.
Сесаго дувцачох унзарваьннача цIендас аьннад:
— ЭгIяьй хьо? Ай лерг ма йий хьо топ кхийттача.
— Цхьа кIеззига молхеи, тоIIадаь каьхати Iочу а делла иштта хьалюзаргья вай цхьа ткъаьх патрон, цо хIама дергдац дегIа хьакхийтача а, — аьннад шек йоацача сесаго.
Мар раьза хиннав.
Iуйранна сецца коа гIолла сесаг а эккхаяь, даггара цIогIа а хьекхаш, топ етта волавеннав мар. Шийх къаьхка йодача сесага тIехьа а удаш, урама тIа араяьлча а из ца юташ хиннав из тIехьа кхувссаш даггара топ а йолаш, аз ювргья хьо да хьакхийца валарг яхаш пхьарч а увш. Из деррига сурт юртарча наха бIаргадайнад. Боккъонца тийшаб лоалахой, эгIаваьлга. Цу хана денз кхы саг воагIаш хиннавац еппараш е, къаракъ меннар а цаменнар а.
Акхарна юхе гIолла тIехбовлаш хилча юстара а баьле болхаш хиннаб нах сихагIа гаьна бовла гIерташ.
Йоазонхо, Хамхой Дауд
№158 (12094), шинара, 23 октябрь, 2018 шу/Вторник, 23 октября 2018 года