Халкъа йоазонхо дагалаьца

Халкъа йоазонхо дагалаьца
Фото: serdalo.ru

Укх деношка Магас яхача шахьара кулгалхоша болх беча цIагIа вIашагIкхийтта хилар гIалгIай халкъа йоазонхочун Боков Ахьмада кхоллам бовзаш а дукха безаш а бола нах. Прозаика а драматурга а йоазошца безам бола гIалгIай а кхыча къамех бола нах а гулбеннарел дуккха дукхагIа ба, уж берригаш тIаэца таро йоацандаь, шевар вIашагIтоха низ дIакхачанзар. Кхыча къамех бола нах аз укхаза хьоабара бахьан да, цо даь йоазош эрсий, казахий, украинций, немций, ингалсий, туркий, хIирий, гIаьбартой, балкхарой, даргинций метташка арадийна хилар. Дувцаш дола вIашагIкхетар хетадаь дар деша говзанча ваьча денна. Цун кхоллам тохкача цхьаболча наха из 25 июне ваьв аьнна яздаьдале а, цун ший дезало из 20 августе ваьрг лоархI.

Нах вIашагIтохаш, цу гIулакха дукхагIа къахьийгар вар администраце болхло М. Мержоев. Литературанна хетаяьча сайрене дакъа лаьцар Магаса хьакимий кулгалхочо Б. Цечоевс, ГIалгIай Республикан халкъа гуллама депутата Ж. Аушевас, республикан профсоюзий объединене председатела З. Мамиловс, «ГIалгIайче» яхача газета керттерча редактора Ш. Боковс, «СелаIад» журнала керттерча редактора Б. Горчхановс, йоазонхочун воIа Л. Боковс, несо Л. Боковас (Ужаховас), кхычар.
Ахьмада хьабенача вахара а кхоллама а наькъах лаьца доклад йир цун воIа. Цо белгалъяьхар йоазонхочун вахаре хинна керт-керттера моттигаш, даь йоазош. Вай литературе эггара дукхагIа романаш яздаьрех хиннав из. Массанена довзаш, дезаш да цун «Беке къонгаш», «ЦIийенна сайре» (ши книжка), «Седкъашта юкъе седкъа санна», «Iаи бIаьстии къасташ», «Готта коанаIараш» яха, кхыдола романаш.


«Седкъашта юкъе седкъа санна» яха роман яздаь шийна дагадоагIаш хиларах дийцар З. Мамиловс. Из яздеча хана, МагIалбике мехкдаьттан бурув детташ вола болхло хиннав Закре. «Бурув деттача моттиге хьалвайя, болхлошца бийсаш йоахаш, цар болх дикагIа бовза гIертар Ахьмад», — яхаш, дийцар Закречо.
ВIашагIкхетаре къамаьлаш дир кхычар а, цар массане а белгалдаьхар дар Боков Ахьмад деша йоккха говзал хинна ца Iеш, хьинар долаш саг хиннилга а. Цунна тешал деш да, йоазонхочоа денна совгIаташ. Царна юкъе я «Сийлен белгало» яха СССР орден (1976), ВЦСПСа а СССР йоазонхой Союза а преми, «Карахдаьннарех» яха ГIалгIай Республикан орден (1999), Россе «ДоттагIала» орден (2006). Цун ара мел дийннача книжкай дукхал дIалаьрхIача, царех 2 миллион 800 хул.
Боковс мел даь йоазош, вIашагIтеха, цхьана арадаьнна хиннадац. Духхьала наьна меттала цо даьрех итт том хургьяр. Уж иштта арадаьхача бакъахьа хеташ, къамаьлаш дир гулбеннараша. Цул совгIа, цун цIерах литературни преми хилча бакъахьа хетараш а бар. Цу хьакъехьа са белгалдаккха безам бар, премешцара гIулакх вайцига геттара эсала леладеш хилар. Сона дагадоагIаш, дIакхайкаяьяр В. Джабагиева, И. Базоркина, Т. Бекова цIерагIа хургйола вай республикан чухьара премеш. Тахан царех цхьаккха йолаш а луш а яц. Эрсий йоазонхой цIераш лелаеш, итташ премеш я Россе. Вайцига а хила мегаргьяр уж, нагахьа санна из гIулакх Iаьдала болхлоша, кхоллама цхьанкхетараша цIенхаштта леладоре.
Хьалха хиннарашта 4-гIа преми IотIакхетар а дика хургдар. Масала, В. Джабагиева преми къаман юкъарча балха тIа белгалбаьннарашта яла мегаргьяр, И. Базоркина цIи лелаер – драматургашта, Т. Бекова преми – поэташта, А. Бокова цIи тиллар – прозикашта. Бакъда, хала хете а, царех цхьаккха а тахан йолаш яц. ХIаьта Боков Ахьмад дагавохийташ, цун книжкаши Магасера цхьа урами мара хIама дац.
Ювцаш йола литературни сайре хоза а безаме а дIайихьар вар М. Точиев.

С. Арчаков

№125 (12061), ера, 23 август, 2018 шу /Четверг, 23 августа 2018 года

 
По теме
Общероссийское общественное движение «Бессмертный полк России» дал старт творческому конкурсу «Мы этой памяти верны», посвященному незабываемому подвигу солдат Красной армии в годы Великой Отечественной войны — битве за Ржев.
Участковые уполномоченные полиции в ходе проведения мероприятий в рамках декриминализации топливно-энергетического комплекса обнаружили, что житель Малгобека повторно самовольно подключил домовладение к газопроводу.
Газета Ингушетия
Следственным отделом ОМВД России по г. Назрань по материалам отдела уголовного розыска ОМВД России по г. Назрань в отношении двоих подростков возбуждено уголовное дело по п. «б» ч. 2 ст.
МВД России по Республике Ингушетия
Медицинское обследование в 2023 году прошли 124 тыс. несовершеннолетних жителей региона, или 96% от общего числа, сообщили газете «Ингушетия» в пресс-службе Главы и правительства республики.
Газета Ингушетия
Корь - это острое инфекционное заболевание, характеризующееся общей интоксикацией, воспалительными явлениями со стороны слизистых глаз, носоглотки, верхних дыхательных путей, характерной сыпью.
Роспотребнадзор