Ноябрь бетта 10 дийнахьа ХIирий мехка Буро тIа «317 мыслей» яха литературни фестиваль дIайихьар къонабарашта лаьрхIа. Цига дакъалоацаш баьхка хьаьший бар ГIаьбартой-Балкхарашкахьара, ГIалгIашкахьара, Нохчашкахьара къона йоазонхой, иштта ХIирашкахьара а бар фестивале дакъалоацаш кагирхой. Уж дукхагIча даькъе 30 шерага кхаччалца ха йола стихаш язъеш бола овтташ латта поэташ бар.
ВIашагIкхетар дика кийчдаьдар, доакъашхой шоайла бовза а йиш хургйолаш, вIаший дага бовла а цар аьттув хургбоолаш. ДукхагIа укхаза гулбеннараш эрсий меттал яздеш бола кагий нах бар. ХIара доакъашхочо цаI е шиъ ший стихотворени ешар фестиваля доакъашхошта хьалхашка. 15 шерагара болабенна къона бале а дика язъяь стихаш яр дукхчар йийшараш. Къаьстта наха хоза хетарца белгалъяьлар укхаза Нохчашкахьара ена хиннача 19 шу даьннача Амната стих. Нах дика дара а, во дитара а тIахьехаш, адам вIаший дукхадезаш хилар кхайкадеш уйлаш яр цун эздича мугIарашта юкъе.
«Новые горизонты» яхаш цхьа форум я Къилбаседа Кавказе бахача кагийча наха шоай уйлаш чакхъяха а шоай гIулакх хьаллаца а аьттув луш, къахьегаш. Цу форуме хинна цига чакхваьнна ва ер «317 мыслей» яха фестиваль дIахьош вола хIире зIамига саг Кадзаев Арсен.
«Таханар ер са проект хьожаяь я Къилбаседа Кавказерча мехкашкара къона йоазонхой хьагучабаха лаьрхIа. Вайна бий а ца ховш, дика яздеш дукха кагирхой ба Кавказе. ХIаьта уж наха бовза а беза, цар уйлашка кхайда дикадар хьаэца а деза наха», — йоах фестиваль дIахьош волча Арсена.
Укх тайпара вIашагIкхетараш Кавказе чIоагIа лерхIаме да. Укх мо долча цхьанкхетарашка гIолла барт а, машар а, цхьоагIо а Iалаш де аьттув ба бакъача хIаманна тIехьа. КIезиг-кIезига къахьегаш хилча хIама меттдоагIа. Ер фестиваль укхаза хинна Iергйолаш яц, дIахо а Кавказа кхыча мекхашка гIолла яржаш хургья из шийна тIехьа къона поэташ хьагучабоахаш гулбеш.
Матенаькъан Илез
№167-168 (12103-104), шинара, 13 ноябрь, 2018 шу/Вторник, 13 ноября 2018 года