​ДИКА БЛОГЕР – НАХА ПАЙДА БАХЬА ЙОАЗОШ КХОЛЛАР

​ДИКА БЛОГЕР – НАХА ПАЙДА БАХЬА ЙОАЗОШ КХОЛЛАР
Фото: serdalo.ru


Интернет сеташка гIолла шоай оагIош, блогаш лелаеш болча наьха ди дездеш цIай да июнь бетта 14-ча дийнахьа. Из да Халкъаштаюкъера блогера ди. Сов дукха ха яц из цIай юкъедаьнна, дукхачарна дагайоагIаш а хургья, из этта ха. 2004-ча шера 40 паччахьалкхера массаза а яздеш болча 500 блогера лаьрхIар кхыча говзанчий санна белгал а даь шоашта ди оттаде. Цу дийнахьа лаьрхIар шоайла вIашка а бетталуш моаршал а хетташ вIашаий бовзаш ха дIаяхьа. ХIана аьлча, интернете гIолла къамаьл дIа-хьа дувцаш, цхьацца хIама яздеш хилара тIагIолла эр хилар мара, шоайла дукха бовзаш хилац интернета багIархой.

2004-ча шера ма хетта ца отташ дисад из цIай. Бакъда ши кхо шу кхы а дIадахарца, ший блог а йолаш цу чу яздеш мел хиннача блогераша лаьрхIад 2007-ча шера июнь бетта 14-ча дийнахьа из ди дездеш, цу ден хетадаь йоазош де аьнна. Массане а – дунен тIарча блогераша цу дийнахьа цхьана дукха йоазош даьд, из ди хиларца цIай а лаьрхIа вIаший даькъала бувцаш. Цул совгIа, шоайла бувзам хилар мел лоархIам болаш да а, вIашаий лоархIаш тIера болаш шоаш хиларах а яздаьд цар. Цу хана денз дика дIачIоагI а денна дIаэтта хьадоагIаш да и ди. Вай паччахьалкхе Россе бахача блогераша а леладу из ди ишта.

Интернете багIаш, шоайла дIа-хьа эр леладарал совгIа, цхьацца наха юкъе этта хьал дувцаш, из дашхара тIехьа йоазош деш хул блогераш. Цу тайпара бараш вай мехка а кIезига бац. Хьалха 2005-ча 2010-ча шерашка дукхагIа «Живой журал» яха хIама дар болагераша яздеш а моллагIа дешаш ийдеш а. Цул тIехьагIа ди тIехьа «Живой журнал» дуташ «Facebook» оагIонашка дIачубахар нах. Къаьста вай мехка бахархошта из сайт дика тов.

Ишта цу интернете гIолла цхьацца наха пайда баргбола хIама яздеш а, хьоахадеш а, дувцаш а болча дикача блогерах я Центр-Камазе яхаш йола Iамарханаькъан Зарема. Цо ийдеш долча дешашца, увттадеш долча хаттарашца чIоагIа сакъердалу наьха. Цул совгIа дикка пайда а боал царех наха.

Интернете Заремас язду 5 шерага кхоачаш ха я. Юхьанца йолалуча хана «Живой журнале ший блог а яр цун». Цига гIола Заремас дукха хаттараш ийдора наха накъадаргдар а цаэшар а фуд хьалха доаккхаш. Цу хана дукхагIбола подписчикаш эрсий бар Заремай. Из дага ухаш йоах цо:

«Са блоге дукхагIа са хинна подписчикаш эрсий бар, са ник гIалгIай цIи йолаш ца хилар бахьан хургдар из. Цу хана тайп-тайпара дешаш ийдора аз сай блоге. Са цIен-дас аьлар сога со блоге яз де йолаелале, «динах дола хаттараш ма ийделахь цу чу». Укх денга кхачалца ишта цо сайга аьннача тайпара динах хIама ца дувцаш хьайоагIа со».

Лакхе аз ма аллара наха юташ санна из ший блог йитай Заремас а. ХIана аьлча, кхыйола аттагIа йоа сеташ хьаяржарца, Живой журнал наха дитар. «Цхьа ха ялча блог йитар аз. Цул тIехьагIа аз Facebook, Инстаграмм, Вконтакте яхача сайташка гIолла сайна оагIош хьайийлар. Сайна хетар язде аьттув цига дикагIа хулар са. Дукха ха ялале подписчикаш а хьаIайра, хIара денна дукхах хулаш», — иштта ше юха язде йолаяларах дувца Заремас.

ТIехьарча шерашка вай мехка заIап болча наха дикка терко е баьннаб, Iаьдла а, вешта юкъарча а организацей викалаш. Из дош дувцаш, доашхаш дукха хул Заремай йоазош. ДIахо цох лаьца дувца Заремас: «Укх тIехьарча хана аз дукхагIа хьалъийду хатараш да заIапхоех, мискача нахах лаьца, цар хьашташ мишта кхочаш дича сайна бакъахьа хет дувцаш. Сай нидз ма кхочча цу наха новкъастал де а хьож со. Иштта аз яздер да нах шоайла Iимерза хила безалга, воай мехкахой барт болаш хилал безалга дувцаш. Барт вай хуле дерига а дика хургда вай. Массаза аз оалаш да дика дар дика да ала, во дар во да ала. ХIана аьлча, деррига во да яха йиш яц вай, е из нийса а дац. Массаза деррига во долаш хилац. Вай мехка дукха дик дараш да, дикача оагIорахьа дукха хувцамаш да хьабIаргагуш. ХIара денна хьаеллаш ишколаш, берий бешамаш, больницеш я. Са-м дог гIоздоал уж керда гIишлош хьаелаш бIаргаяйча».

Цхьавола блогер хул ше яздичахьа сагота воацаш, моллагIа цхьа хIама яздичахьа яхаш харцахьа а бакъахьа а интернете йоазош деш. Амма блогера ха деза ше деш долча йоазох наха пайда баргба е зе даргда. Цох а ший тайпара уйлаш я Заремай:

«Эггара хьалха язде волавалалехьа блогера ха деза ше фу язде воал, дика оагIо, во оагIо теркал е а ха деза цунна. МоллагIча темах цо яздой а из Iодийшача наха цох пайда эцаргболаш хила деза цун йоазош. Во дар яздеш хьава-м дуккха а аттагIа да. Бакъда, укх мехка во да яхаш воай дагIе лолахой, кхы дIахо гаьнагIа бахаш бола воай подписчикаш тешаргба вай къамаьлах. ТIаккха, ва ма къа долаш къам да ер, ма ираз дайнад акхар аьнна хетаргда царна. ТIаккха вайх дог кхоардадар кхерам а ба цар. Цхьабакъда хьаким бакъ воацаш мотиг нийслой, хьо бакъвац аьнна язде деза цунга. Нийсвале – укхаза нийса ва хьо ала а деза. ФуннагIа Iа яздой а, яздер бакъ хила деза, ший овла нийса болаш хила деза из. Хийттар, хезар, керта чу мел денар язде эшац. Цох зе мара пайда а баргбац ишта хуле», — йоах блогера Заремас нах бакълийча бакъахьа хеташ.

«Ма чIоагIа дукха беза-кх сона вай мохк а вай мехка бахархой а. Се укхаза сай мехка яхаш доаккхал ду аз, се гIалгIа хиларах а докхалдеш я со», — йоах Заремас ший ГIалгIайчех доаккхалдеш а из дукха езаш а.

Зарема ше яьй 1975-ча шера Ньасаре. 1992-ча шера дика дийша чакхъяьккхай цо Наьсарен № 3 йола ишкола. Цул тIехьагIа деша яха шиъ лакхара дешар Iомадеш дийша я Зарема. Из я тIехдика экономист, психолог.

Карарча хана Зарема болх беш я «Республиканский центр дистанционного обучения для детей инвалидов» яхача цIагIа. Мукъача хана къахетаман фондашца бувзам лелабеш ха дIахьу цо. Ше «Тешам» фонда попечительски совета доакъашхо а я из.

Заремай виъ дезалхо ва. Ший цIен-даьна мутIахьа а йолаш цун фу тов а хьожаш дезал кхебеш я из.

Дукха ба Iамарханаькъан Заремай йоазош хоза а хеташ, царца са а къердалуш уж дешаш нах. Со се бакъдар аьлча, Заремай йоазош дешаш царех пайда хулаш ва. Хий мелча хьогал йовж мо кIаьдвалар дов са Заремас яздаьр дийшача. Иштта цо даь йоазош дешачарех ва Бузартананаькъан Ахьмад а. Из ше а ва дика блогер.

«Эггара хьалха интернет сеташка язде болабенна наха башха дац наьха вахар а гIулакх а. Цу тайпара бола нах ба ала йиш я кортамукъа а шоашта лайна хинна журналисташ а. Цар язду наха хайча бакъахьдар, наха дагадоаллашдар. Ишта болча наьха мугIарах латташ я Зарема а. Цхьабола нах уйлашца кегалуш нийслу интернете багIаше а, хIаьта Зарема ший уйлаш нийса а лоаттаеш, наха бакъхьдола хIама яздеш я. Цхьа моллагIдола хIама дикача, хозщача оагIорахьа бIаргагу цунна, из начIал Дала деннад цунна. МоллагIа бала болаш доа хаттар айдеш хилча, наха из хала хетаргдоацача тайпара Iоязде а дашха а аьттув боал цун. Дукхача вай мехкарча наха пайда хулаш долча ногIалашка дакъалоацаш а хул Зарема. Дала ишта наьха уйлаш нийслургйолча тайпара язде а, ногIалашка дака лаца а аьттув боаккхалба цун. Цунгара масал эца аргдар аз кхы дIахо болча блогерашка, хIана аьлча, хов цун язде», — йоах Бузуртананаькъан Ахьмада.

ХIаьта сай оагIорахьара а тхоай редакцегара а даькъала бувцаш ловца боаккха аз массаболча блогерашта. Дала маьрша леладолда шо. ЦIаккха а дика мара язде во х1ама ма хилда шоана.

Матенаькъан Илез

Сердало

№ 84-85 (11820-821), четверг, 15 июня 2017 года

 
По теме
(Ужахова Хадижата 100 шу дизарга) Са ираз хиннад дуккха цIихеза гIалгIайи нохчийи бовза, царца бувзамаш, гIулакх леладе.
В связи с предстоящим юбилеем 100-летия образования ингушской государственности, Министерство культуры напоминает о Республиканском конкурсе на создание лучшей композиции, в рамках подготовки к юбилейному праздничному мероприятию.
Источник фото: Фото редакции Полиция от местной жительницы узнала, что женщина, которая назвалась Светланой Федоровой, под предлогом продажи посредством соцсетей мебели, бытовой техники и посуды, в 2022-2023 гг.
Источник фото: Фото редакции Национальный проект «Демография», как известно, нацелен на улучшение благосостояния семей за счет мер финансовой помощи, которые будут способствовать повышению рождаемости,
photo_5343742741852575501_y (1) - Министерство культуры ГБУ «Филармония им. А. Хамхоева» станет организатором конкурса, в котором могут принять участие все желающие.
Министерство культуры
В ОФСИН России по Республике Ингушетия прошли пожарно-тактические учения - ОФСИН по Республике Ингушетия Сотрудниками ведомственной пожарной охраны ОФСИН России по Республике Ингушетия совместно с работниками пожарно-спасательной части № 4 г. Карабулак МЧС России по региону были проведены занятия,
ОФСИН по Республике Ингушетия
Суд апелляционной инстанции по уголовным делам Верховного суда Ингушетии 28.03.2024 рассмотрел материал досудебного производства по апелляционной жалобе защитника на постановление Магасского районного суда,
Верховный Суд
Корь - это острое инфекционное заболевание, характеризующееся общей интоксикацией, воспалительными явлениями со стороны слизистых глаз, носоглотки, верхних дыхательных путей, характерной сыпью.
Роспотребнадзор
В рамках реализации всероссийского проекта «ДоброВСело» врачи Сунженской центральной районной больницы совместно с волонтерами-медиками провели масштабное профилактическое мероприятие в сельских поселениях Чемульга и Аршты.
Газета Ингушетия
Стартовал региональный этап Всероссийского конкурса исследовательских проектов «Без срока давности» - Министерство Образования С 20 марта стартовал региональный этап Всероссийского конкурса исследовательских проектов «Без срока давности», который продлится до 10 апреля 2024 года.
Министерство Образования