ТИЙШАБОЛХ БАЬЧОХ БОДА

Фото: serdalo.ru

ДУВЦАРАШ

Сецца сомаваьлар Ахьмад. Хоалуш дар сатоссаш латтилга, камера чу лакхе доаллача зIамигача корилга сердал хайра ца йоагIе а. Юкъага денача лазаро корзагIваьккхар из. Хоадайича санна лазар дора цо. Бутт совгIа ха яр цунна из лазар гучадаьнна. Лазар ла дезаш дар гIулакх. Iемавар из-м цул халагIадар ла a. Kxoaлaгla шу дар, бехк боацаш, набахтара Iазап цо оза.

Ахьмад метта хьалъурахайча, геттара сихделар лазар. Вешта, «мотт» ала а хала дар кIал иллачох. Бетона тIа IотIайилла цхьа чIаьпилг мо йиткъа боамбилг чубилла хIама яр-кх. Тамаш ярий тIаккха цу кIийлен тIа вижа уллача сага лазар кхетар?! Ший дегIаца низ болаш хилара, дикка ха яьккхар цо «набахте» яхача жожагIатено кIал ца вуташ. ЗIамига волча хана денз дегIа унахцIена хиннавецаре, хьогге кхайкор лаьца а хургдар. ДукхагIбараш цу лазаро кIалбитар цу йоккхача набахта. Иштта кхоабар лийца боахкараш. Саг хьаваргволаш кхача а бацар телаш хиннар. Моцала вала воаллачоа а IочугIоргйолаш хилацар хийла хьачуенна хIама. Паччахьалкхено ший моастагIашца леладу моастагIал дар из. Хийла ди доагIар Ахьмада, е Iазап озаш вахачул топаш тоха суд яь ялар-кх сона, аьнна, хеташ. ТIаккха валара цхьа хало ла мара езаргьяцар. Шозза валара нийса хетар цунна шийга кхаьча хьал. Денош а бийсаш а вIашагIъийна, дIадодар цун вахар. Баьдеча каша чу мо мара хьайистхила а, е дIайистхила а саг вацар. Фу де эш цу тайпара вахар. Кхыметтел нийсхо ярг ма йий аьнна, даха дог ца хилча?! Дийна волаш араваргва-кх со, аьнна а, сатасса а хIама юхедисадацар миска. Харца луне да ер яхаш, боккхийча наьха дешаш каст-каста дагаухар Ахьмада.
Ший бехк а болаш чувахачоа а ла хала долаш фусам я набахте. ХIаьта цхьаккха бехк боацачо? Пехьарча хана иштта ше-шийца къамаьл дора цо.
«ХIана котбувл харцон низ?! Мичай нийсхо? Низболча паччахьалкхено ший къонгий бокъонаш хIана лораяц?» — Цу хаттараша корта бIагорабоалабора. Вешта, ший къам, бехк боацаш, мехках даьккхача денз нийсхон наькъаш къайла долга гучадаьнна дика ха яр цунна. Цу хана байнабар паччахьалкхен хьа кимех бола тешам а. Укхан дай вошеи мо, эзараш бола кIантий Даймехка тIем тIа легача хана тиллаецарий «къаман моастагIий», аьнна, бIеха цIи дерригача цун халкъа!
Хийла иштта еча уйлаша дицдолийтар Ахьмада ший лазар. ХIаьта дега хинна чов цIаккха ца соцаш, узам беш яр. Лергашкара дIабалацар судо баь харца соцам: «ЛаьрххIа кийчо а яь, йоккхача къизалца саг верах 25 шу суд…
Ма къиза кхел яр-кх цунна яьр. ВанагIа, гIанахьа дар из, е сомах дар, аьле а, хеталора цхьайолча хана. ТIаккха, уж тешаш?
Фу дар цар даьр?
Дог чIехкар Ахьмада, харц тешал даь, шийна тIалеткъа нах дагабехача.
Шоашта фу хургда ховш дарий-хьогI цар из?! Са ца доаки халуш, къамарга шод увттар цунна из деррига дагадехача.
Ший син уйла йича воалаш вацар Ахьмад. Шийла чIоагIагIа а дагабоахкар цунна цIагIа биса нанеи, йижарийи, дийха дагIа нускали. БIаргашкара дIадалацар судо баь соцам хьакхайкабаьча дийнахьа еха хьайзача наьна сурт. Боккхача бале Iаьржъяьяр из. Халача хана сийнача СибарегIа цаI мара ца висача воIах ялар сино ма лов хала хIама дар. Из дика кхетадора Ахьмада ше а. Кхел иштта яр цар.
Дагардалацар Ахьмада нанас тIеххьара, къасташ, аьнна дешаш:
«Дала ше ергья нийса кхел. Са воI, болх Даьлага ба вай Тийшаболх цIаккха чакхбалац. — Тешалде эттарашта пIелг тIа а хьекха, акхар мо къонахчали гIалгIай эздели ма дохкалахь, фуннагIа хьайна тIакхоаче а». МассагIдар Ахьмада дагадоалаш. Дукханахьа кхоачар цун уйлаш. Уйла е а шортта ха яр цунга. Уж уйлаш дукха ярах, кIайча асаро кIайбаьбар цун корта. Къонача юхь тIа а хобораш хоалора.
Ерста, герга хинна юхь, мочхалаш чукхийтта, ийрчаяьнна яр. Юкъ-юкъе ше дилла лийрхIа керда вахар дага дехе, юхь сийрдайоалар.
ТIаккха духьалдоагIар цун езача йиIий — Хаьде сурт. Цун делача бIаргаша дог хьоастар Ахьмада. Безаман ало син-пха а лоацаш, йIовхал лора дерригача дегIа. Дукха ха яр уж шойла бовза а беза а.
Хаькъал долча наха нийса яьха хиннад: лийрхIар хиннадац хIамах, дегIар мара. Дукха хIама хувцаденнад. Адамий моастагIий къизал я сох яхар. Мичахьара гучаяьлар цу къизала лараш?! Уж гаьнара хьайоагIаш хиннай. Юха а ший уйлангахьа вода Ахьмад.
Кхийна хьлъэтта зIамига саг вар Ахьмад, шоай лоIамах боацаш, кхыбола мехкахой санна, шийлача Казахстане уж кхаьчача хана. Да а воккхагIвола воша а тIем тIа баха, ди доацаш бар. Нанеи кхо йишеи дар цунца, уж шийлача мехка Iокхаьчача хана. Дукха ха ялалехь, наькъа йоагIаш, лазар а лаьца, дIаяьлар йоккхагIйола йиша.
Шоай хур-могар дора Ахьмада а цун йижараша а наьна бала байбе гIерташ, цун дог хьесташ. Нана ше а саготонаш ла Iемаяр. Сага сино ца ловш хIама дисац. Дукха лайнадар цо цу шерашка. ГIйагIа, бала боацаш, атта цIа дацар. Массанахьа хало а моцал а яр хьувзаш.
ЧIоагIа хала дIадахар уж хьалхара къиза шераш. ДIахо нах, цхьа бахьан балха дIатовса а бенна, баха Iохайшар. Хало эша а еш, цIагIоргхиларах дог ца дуллаш, къахьега болабелар вайнах. Иштта наха нийсса бахаш бар Ахьмадар дезал а. Цхьабакъда, кер биззалца цкъа хьалдаа хIама доацашбараш а дукха бар.
Наьна дог хьоасташ, дика кхийнавар Ахьмад: хьаькъал долаш, дегIа унахцIена волаш, нахаца Iимерза волаш. Йижараша а доаккхалдора шоай воша дика а хоза а волаш. Колхозе бригадиралла балха вахавар из. Цу бригаде цунца болх беш тайп-тайпарча къамех нах бар. Массане а шоай новкъост лоархIар цох. Бригаде мел вола саг цхьа барт болаш вар.
Сар-сарахьа шоаш балхара баьлча, вайнаьха ловзар оттадора цар кха юккъе. Эрсий а, казахаш а Iомабаьбар вайнаьха Iаьдала халхабувла. Акхарца бригаде ший вешийца болх беш яр Ахьмадаца деша яьгIа Хаьди а. Хоза хетар Ахьмада, из бIаргаяйча. БIарг сийрдабоалар, дог гIоздоалар, из шийга йистхилча. ЙоIо зувра Ахьмад цхьа ший тайпара боккхача безамца шийна бIарахьежалга. Безам лочкъалац, оал. Наха а гучаяьннаяр цар «зIамига къайле». Хаьди дукхачарна бага яха, хоза кхийна йоI яр. Iаьржа корта, герга юхь, кIай цIока, тайжа болар, кIаьда йистхилар — деррига дар цун сурт диллал хоза. Цкъа дIайхача дийнахьа колхоза конторе вIашагIкхийттар Ахьмади Хаьдии. Контора чу ваьгIар араваьлар. Ераш цхаь бисар. Ахь-мадаца готтача цIалга чу латта тоам ца хеташ, арайолаелар Хаьди.
— Хаьди, цхьан минота сабардел, — аьлар Ахьмада. Шорттига юхахьажар йоI. Юхаозалуш зIамига саг ше а вар. Ше къамаьл мишта дIадоладергда ца ховш, корах арахьежжача латтар из.
— Фуд цига, Ахьмад? Ара хIана хьеж хьо? — хаьттар Хаьде хоаяллал цIий а луш, ший кIаьдача оазаца.
— Хац сона-м. Иштта лийнна даргдий вай?! Со фу ала воал хой хьона? — хедалуча оазаца хаьттар цо.
— ТIа фу ях сона-м хац… — Еррига цIийелар цун хоза юхь.
— Ха ха-м я, Хаьди. Вай довза дикка ха я. Са дагардир хьона дика хов, аьнна, хет сона-м… — Майра ший къамаьл доладир цо.
— Сона сенах хов наьха дагардар? — ший ши бIарг лаьттара ца боаккхаш, латтар Хаьди.
— Дагардар ха массаза дешаш эшац. Из хьона а сона а шаьра хов. Дукха хIама да, цхьаккха дош юкъе ца доаладеш, кхетаде йишйолаш. Мел дукха е къамаьл вай дола ца деш дIатийттадале а, цкъа укх тIа кхача дезалга ца халла, зIамига мичад вай!?
— Аз кхетадеш хIама дац Iа яхар… — Оаз лаыллуш йоагIар Хаьде.
— Дика кхетаду. — ЙоIа эгIаваьлар Ахьмад. — Сона дика йовч хьо. Дика яйза а ца Iеш, дег чура дукха…
— ЧIоагIа йIайха я-кх укх чу… — Къамаьла юкъеийккхар Хаьди. Араэккха лаьрхIадар цо, Ахьмадас сов сиха наIара ко лаьца мара.
— Малхо тела йIовхал ла мегаргья. Цун ала сел боккха а бац. Безаман ало чIоагIа воагаву…
— Со-м паргIатта латта мукъа яц, сога хьежаш нах ба. — Кор загIьяьнна хьайзар Хаьди. Тоам хетацар цунна цу къамаьла ладувгIа. Эхь хеташ, ше фу дергда ца ховш, латтар из.
— Саг чувоале а хац… Наха фу хетаргда?
— Хаьди, хьо сел йоха езаш хIама дац укхаза, е саго баккхI бехк а бац. Аз хIама яхац… Хьо раьза еце, кхы дIаьх а ца деш, дутаргда вай ер. Со-м сайна хетар хьона а хет мотташ вар… Хье Даьлах теше, тешалахь — хьоца хинна са уйлаш цIена хинналга. Хьа сий Iодожаргдола хIама аз цIаккха дергдацар, нах бале а беце а. Лоацца аьлча, сай цIенача дег чура хьо сайна езандаь, вай вахар цхьан хеттача бакъахьа хетар сона… Хаьди, Iа сох бехк боаккхе а, аз сай дагардар хьога дIаях.
— Ахьмад, из дувцача дац вай xIaнa. — Сага хазар кхераш санна, шорттига аьлар Хаьде уж дешаш.
— Аз сихъяц хьо. Цхьа дош мара, хIама эшац сона.
— Дош ала а ха йоагIаргья. Сихлургдац вай. Кегаенна зама я ер…
Цхьа ший тайпара безамеча оазаца аьлча санна хийттар Ахьмада тIеххьара Хаьде аьнна дешаш.
Шийна йоI духьала ца хилар белгало гучаяларах, дог гIоздаьлар Ахьмада. Хьежа раьза вар из.
Хаьдена баркал а аьнна, ваьнна, дIавахар Ахьмад.
Цул тIехьагIа дукхаза хилар цар къамаьл. Денгара ди массаза доал совбоалаш бар царна юкъера безам. ЦIагIарчарна а дIахайнадар цар дагардар.
Берригаш раьза бар. Цхьабакъда, цаI вар цар ираза духьала. Цун уйла бIеха яр. Из ший тийшаболх кийчбеш вар. 3Iамига волча хана денз, Ахьмадаца яхь йолаш хьавоагIар цар юртара милице начальник хиннача Iадлопа воI Беслан. Наха Бесик оалар цох. Даси нанаси, цаI мара вац яхаш, боча Iомаваь, Iалаьмате во оамалаш йоахкаш вар из. ГIов а сибат а дацар цун дикача сага тара. Нах моцала бовча хана а, ший курал хойташ вар. Хийла къаьнача исташа а оалар цох: да а да «бесий кIориг», аьле. Колхозе учетчик ва яхаш, дер дайна хьувзаш хулар болх беш боахкача наха юкъе гIолла, шецца йIаьха гIаьле бага а елле. Хаьдена бIарг тIаэттабар цун, Ахьмад а из езаш ва, аьнна, шийна хезачахьа. ДукхагIа цунна дагаяьлар Ахьмадацар чIир яр.
3Iамига волаш, Ахьмадас дукха нихь тийса вар из.
Цкъа цхьан сарахьа, кхай тIа халхар оттадаьча хана, ловзара юкъе ваьлар Бесик. Раьза йоаццашехьа, новкъосташа цунца халхаяккха юкъе кхессар Хаьди. Малара дагахьа вар вож. Халхара цхьа го баьккхачул тIехьагIа, хьакхашта халхавувла ваьлар Бесик. Из дика зувш Ахьмад а латтар. ДIа-юха хьежа ваьлар из, наха юкъе Хаьди воша вий хьожаш. Из вацар цу дийнахьа.
Хаьди цхьаккха дича юкъера дIаараялийтацар. Юххера пхьарс техха, керта тIара косынка дIадахийтар.
Кхы сатохадаланзар Ахьмада. Ше ма водда Беслана тIаваха, бий теха багара цIий дIадохийташ, хьалвIаьхвеш, вожавир цо из. Цигга нах юкъебенна, вIаши кулге бига, къоастабир уж. Цхьабакъда, шийна даь эхь дита лаьрхIа вацар Бесик. ШоллагIча дийнахьа Хаьди низагIа йодаяь водачара, наха баьча хоама оарцагIваьннача Ахьмада хьаяьккха, ший даьшка юхаеннаяр йоI. Цигга, дукхача наха а хозаш, дув биабар Беслана: «Са даьсара, сога ца кхоаче а, Ахьмадаца вахар хетта Iа ма ховргьяц хьо», — аьнна.
Шозза Ахьмадас шийна даь эхь цIада чIоагIо йир Бесико ший даьна хьалхашка. Бакъда, сих ца луш, дикка уйла яь, чIир леха лаьрхIар цар цхьана. Хиннар шийна дIахоззашехьа, Ахьмада нанас, сиха яха, боккхий нах оарцагI а баьха, зоахалола юкъе нах бахийтар. Шаккхе даьй раьза а хинна, гурахьа кхай тIара балхаш чудерзадаьчул тIехьагIа Хаьди цIа а югаргйолаш, йийха Iохоайир.
Ахьмадас дукха сатийса ди гаьна дацар. Ахкан бутт чаккхбоалаш латтар. Хаьди балха ахацар, цIагIа йитаяр из Бесиках дика лоархIа ца беш. Ховр царна цхьаккха бIехача хIамах хьадж ца йоагIа саг из волга.
Цхьан сарахьа балхара чувеча, Ахьмада чIоагIа гIайгIане яха ягIа ший нана яйра.
— Нани, фу хиннад вайна? Хьо ма чIоагIа вIашкаяха ягIа! — хаьатар цо, цунна юхе Iо а ховш.
— Циск доацаш да вай.
— Ай, циск арадаьннад аьнна, гIайгIа йой? ЧудоагIаргда.
— ЧудоагIаргдац. Тахан кхоалагIа ди да из доаца.
— Нана, циск доацаш дусаргдац вай. Аз дахьаргда хьона.
— Дедда цIагIара дIадахад из. КIаьнк, хьо кхетац… Во белгало я из. Сона хов хьона айса фу ях… Хьол дукхагIа яьхай со укх дунен тIа. ТIабоагIача балах дод, оал циск…
— Нана, мехках а даьхача, валар-валар дайча, моцал Iайшача, вайна кхы фу тIакхачар кхер хьо?
— Даьра, яа сискал йоацаш дукха ба хIанз а…
— ХIама дергдац. Денгара ди массаза доал тоалургда наьха вахар а. Долла хIама дIадаьлча, болх бе а бокъо хьа ма яьннайий вайна.
— Дала дергда вайна дикадар.
Ахьмада шоллагIча дийнахьа дицделар наьнаца хинна къамаьл. Цо вIалла теркалдинзар из. Ший балха ухаш, чувеча, дехьа-сехьа вахе, ший нийсархошца ха дIахьош лелаш вар из. Цу хана бахара-бахкара нах тIера бар, цхьаннахьа сар-сарахьа шоай apгIaгIa вIашагIбетталора кагий нах. Дахар-денар дувцаш, цIагIоргхилара керда хIама дий хьоадеш, ха дIахьора юртахоша. Юрт зIамига хилар бахьан долаш, берригаш шойла дика бовзаш бар. Хийла цу вIашагIкхетаре Ахьмад а Бесик а цхьана нийслора. Ахьмада Iотташ мара къамаьл деш оамал яцар Бесика. Тахан геттара дог гIоздаьнна вар из. Ахьмада футтаройна колхоза председатель хеставе волавелар. Ховр цунна цул хьалхарча дийнахьа председатело Ахьмад бригадиралла дIаваьккхалга. Ахьмада кхетадора, Бесик юкъе воацаш, из хиннадоацилга.
Укхан даь хьаша ва, яхаш, вар вож. Цхьана дикка къаракъ молаш хилар дар царна юкъе хинна деррига хьоашал.
— Дика саг ва-кх из председатель. Дикача нахаца тарвала а хов. Болхло а зуламхо а къоаставе мог, — юха а ший дохьаж тувсар Бесика.
— Ший цу дикача нахаца цIерах воагалва из! Наьха цIий менна-м ваьннав из, — эгIазлонца аьлар Ахьмада. Цигга хьалкхоссавелар Бесик.
— Хьо воагалва цIерах! Мича кхача гIерт хьо?!
— Хьо а из а цIерах а кIурах а доагалда шо!
Цига юха а вIаши качболхачара наха дIа-юха къоастабир уж.
Цу бусса хиннар бахьан долаш, деррига вахар хувцаделар Ахьмада. Къиза кхел яр цунна кийчъяьр моастагIчо. Ший меттаца аратессача дохьажаца болабир лихьо ший тийшаболх. Цхьа кIира даьннача Iолла, сецца милици наIар тIа ена, лаьца, дIавигар Ахьмад. Ше дIавигачул тIехьагIа, следователе лоткъам эцача хана мара ханзар Ахьмада ше хIана лаьцав. Тамашийна бехк бар укхан хьатIабехкаш хиннар. Хьанна дагадар тийшача балха лар иштта йIаьха хургйий? Бензин IотIамохкадаь, ший цIенош а тIехьа колхоза председатель, воагаваь, вийнав, яхаш бар Ахьмада хьатIабилла хннна бехк. Эггара халагIа цу гIулакха тешалде оттабаь тешаш укхан бовзаш хиннараш хилар. Уж шийна духьлбоалабича, дагадехар Ахьмада кIира хьалха ший Бесикаца хинна къамаьл. Кхийттар ер кIур мичахьара боагIа.
«Маьржа-яI, фу хургда къизача адамал унзарагIа?! Соцара чIир лехар духьа, бехк боаца саг сел къиза вийнав цу аькхо, йоахар Ахьмада уйлаша. ТIаккха е тешаш… Ша мо шаьра хов царна, со бехке воацилга. Аз баьраш бегаш хинналга. Сардам мел баьккхар вувш хул?! Мишта отт Бесика тIехьа!?
XIa-a-а… Ийцаб. Моцало готбаь нах атта ийцаб. Хайнад уж фу нах ба. Сенца эца йиш я аьнна, дукха уйла е езаш хIама хиннадац. Боацача бехках, бIехача наьха тийшаболх бахьан, ткъаь пхиъ шу суд такха езалга деций хала хIама?! Тийшаболх баьчох бода ма оалар …»
Цох тешам байна-м дукха ха яр Ахьмада. ХIаьта а, ший саготделча, ше-шийца лувш хулар из. ЦIаьхха дагадехар цунна сийсара ший наьнагара дена каьхат. Юхь тIа велавалар даьлар. Нанас юха а ший циск дувцар. Вай циск цIенах кхийттад. Из дика белгало я, йоахар каьхата тIа. Цох дика кхаъ хиннаб сона, яхаш яздора нанас. Halapax боаккхаш хиннача чIего ший уйла тIара ваьккхар Ахьмад. Хьачуваьлар ши милиционер. Дукха ха яр из волча саг чу ца воала. Царех цхьанне аьлар:
— Москве Верховни Суде каьхат дахийтадарий Iа?
Ахьмад цецваьлар. Из виц а веннавар цох. ШоллагIа шу дар цо из дахьийта. «Хила водачо мергIилгах катох» яха эрсий кица мо, тIеххьара цо даьр дар из.
— Дахьийтадарий Iа каьхат? — юха а хаьттар милиционера. — ЧIоагIа уйла ма йий Iа ер!
— Дахьийтадар…
— Дахьийтаче, жоп юхакхаьчад. Начальник хьога хьежаш ва. Iохьалхавала.
Ераш начальника кабинете дIачубаьлча, вож бIаргех даьнна хий дIадоаккхаш воаллар.
«Гарт» аьнна, дог тохаделар Ахьмада. MaccaгIa уйла чуессар. Эггара хьалха ший вахар хаьдад, аьнна, хетаделар. «Судо юхадийцача дешо топаш тоха, аьнна, баь хила беза соцам». Водар мара хьалха дага мича дох. Дехкевалар а корзагIвалар а вIашагIийнадар. Ший цIагIа бисараш а духьалбаьхкар цу юкъа. Наьна сурт бIаргашка латтар. Начальник кхийттар укхангарча хьалах. Фуд ца ховш, сагота ер волга хоаделар цунна. Юххера вела а венна аьлар: — Москвера хьалкхаьча амар ер да хьона, каьхат хьакховдадир: Iайха Iодеша.
Хьажъюккъе хьоцар техар Ахьмада. БIаргашта боад еттар. Дагадехар наьна дешаш: «ФуннагIа тIакхоаче а, къонахчали гIалгIай эздели ма дохкалахь». Ший беррига низ ура а оттабаь, сабаре волаш мо кеп а оттаяь, каьхата тIа хьежар из. Юха бIаргашта боад еттар. Цигга кхетабир Ахьмада вахара мах. Вала лацар набахта мел хала яле а. Каьхата тIара хьалхарча мугIар тIара тIехьарча мугIар тIа лелхаш, тIехьарча мугIар тIара хьалхарча мугIар тIа лелхаш, даггара удар бIаргаш. Юххера теша ца луча дешаш тIа сайцар бIаргаш… Мукъавоалийташ, судо бехк тIера боаккхаш дар каьхат. Юхь тIа гIолла Iодоладелар хьоцара тIадамаш. Цун деналах а сабарах а цецваьнна латтар начальник.
— Ай, вела мукъах ле! Цхьа дош ала! Хаьдай хьа тхоцара ха. Текха ваьннав хьо е къиза бала. Гучабаьннаб бокъонца бола зуламхой. Цар тийшаболх хиннаб хьох бахар. Шоашта доагIа тIазар хьоргда цу моастагIаша.
ДIахо вIалла цо фу йоах хазацар Ахьмада. Тийшаболх баьчох бахаб, йоахар цун уйлаша…

Теркакиева Аьсет

№134 (12070), шоатта, 8 сентябрь, 2018 шу/суббота, 8 сентября 2018 года

 
По теме
Лоаца дувцараш - Сердало Чкъаьран тIехк Гийга сутара вар Савар. Хьаштдолча хIаманна сатохаргдар цо, амма моцала сатоха низ таацар цунна фухха дарах.
03.10.2018
 
В музее ИЗО идет подготовка к открытию выставки «Аул Балхар» из Дагестанского музея изобразительных искусств им. П. С. Гамзатовой - Министерство культуры 13 декабря в 14:00 в Государственном музее изобразительных искусств Республики Ингушетия состоится открытие выставки «Аул Балхар».
11.12.2018
В Назрани состоится спектакль по пьесе Горчханова «Ганз» - Ингушетия Ингушский государственный драматический театр имени Базоркина приглашает зрителей на спектакль по пьесе Бадрудина Горчханова «Ганз» («Клад») в постановке главного режиссера театра Мурата Галаева, сообщает пресс-служба учреждения.
11.12.2018
 
Приглашаем на спектакль «Ганз» («Клад») - Министерство культуры Ингушский государственный драматический театр им. Базоркина приглашает вас на спектакль по пьесе известного ингушского писателя Бадрудина Горчханова «Ганз» («Клад»)  в постановке главного режиссера Мурата Галаева.
11.12.2018
 
Адаму Бекову вручена премия «Душа России» - Ингушетия Художественный руководитель детского хореографического ансамбля «Таргим» из Ингушетии Адам Беков награжден правительственной премией в области народного искусства «Душа России» в категории «Народный танец»,
11.12.2018
 
Ингушский ансамбль «Сийг» — обладатель первого места и Гран-при фестиваля «Симфония звёзд» - Ингушетия Детский хореографический ансамбль «Сийг» из сельского поселения Троицкое Сунженского района стал обладателем Гран-при Всероссийского конкурса искусства и творчества «Симфония звёзд»,
11.12.2018
Апелляционная инстанция оставила в силе оправдательный приговор,которым врач,обвинявшийся в смерти пациентки,был оправдан за недоказанностью вины В комментарии «АГ» адвокат Башир Точиев назвал апелляционное постановле
11.12.2018 Magas.Ru
Подвиг не знает возраста 9 декабря в России отмечается День Героев Отечества — особенный праздник, призванный отдать дань мужеству, самоотверженности, патриотическим качествам людей, по праву носящих это высокое звание.
09.12.2018 Ингушетия
Адаму Бекову вручена премия «Душа России» - Ингушетия Художественный руководитель детского хореографического ансамбля «Таргим» из Ингушетии Адам Беков награжден правительственной премией в области народного искусства «Душа России» в категории «Народный танец»,
11.12.2018 Ингушетия
Приглашаем на спектакль «Ганз» («Клад») - Министерство культуры Ингушский государственный драматический театр им. Базоркина приглашает вас на спектакль по пьесе известного ингушского писателя Бадрудина Горчханова «Ганз» («Клад»)  в постановке главного режиссера Мурата Галаева.
11.12.2018 Министерство культуры
Ингушский ансамбль «Сийг» — обладатель первого места и Гран-при фестиваля «Симфония звёзд» - Ингушетия Детский хореографический ансамбль «Сийг» из сельского поселения Троицкое Сунженского района стал обладателем Гран-при Всероссийского конкурса искусства и творчества «Симфония звёзд»,
11.12.2018 Ингушетия
Ингушский государственный драматический театр имени Базоркина приглашает зрителей на спектакль по пьесе Бадрудина Горчханова «Ганз» («Клад») в постановке главного режиссера театра Мурата Галаева, сообщает пресс-служба учреждения.
11.12.2018 Ингушетия
В Ингушетии завершился Всероссийский турнир по хоккею с шайбой среди юношей - Министерство по физической культуре На льду Хоккейной академии Фетисова «Башлоам» завершился  Всероссийский турнир по хоккею с шайбой на кубок Героя России Главы Республики Ингушетия Юнус-Бека Евкурова.
10.12.2018 Министерство по физической культуре
12 декабря в мэрии Назрани пройдет день приема граждан в рамках общероссийской акции, посвященной Дню Конституции РФ - Администрация города Последнее Обновление Дек 11, 2018 12 декабря 2018 года в Администрации города Назрань с 12 – 00 до 20- 00 часов пройдёт личный прием граждан.
11.12.2018 Администрация города
DSC 0097 - Министерство по внешним связям В рамках проведения мероприятий, приуроченных Международному дню борьбы с коррупцией, Министерством по внешним связям, национальной политике,
11.12.2018 Министерство по внешним связям
Специалисты Сунженских РЭС филиала ПАО «МРСК Северного Кавказа» - «Ингушэнерго» выяснили причину отключения воздушных линий электропередачи, обеспечивающих электроснабжение сельских поселений Мужичи, Алкун,
11.12.2018 Magas.Ru