Россе Паччахьалкхен дума депутата Бессараб Светланас жоп деннад, Федерацен Совета соцполитикан комитета кулгалхочо Рязански Валере кердача шера хулаш йолча каникулех лаьца оттадаьча хаттара. Ший хаттаргахьа Валере йоах, Россе болхлоша шоаш харжача мегаций кердача шераца доагIаш дола салоIа денош, цул совгIа, уж дIаьха да аьнна хеташ а ва из.
Светланас яхачох, январь бетта хьалхарча деношка хулаш дола цIай, дукхача Россе бахархошта дезаденна цар хьамсара цIай да, цудухьа уж раьза бац Валере цу хьаькъе оттадаьча хаттара. Цул совгIа депутата белгалдир, из цIай долча хана дукхача Россе бахархой шоай берригача дезалашца гулле а, безам, чам баа а аьттув болаш да, аьнна. Ший къамаьл чакхдоаллаш Бессараб Светланас аьлар, уж салоIа денош лоацдарах долча деша ше раьза цахилар а, ше цун дохьала кхач тоссарг хилар а.
Хьалха Рязански Валере айдаьча хаттара раьза волаш дош аьннадар Россе Паччахьалкхен дума депутата Коломейцев Николаяс. «ДIаьха салоIа денош дIаяхача ханна хинна Iовдала хIама да, массайттаза дийцад из», — аьннадар Николаяс. Цунга хаьттача, кердача шера каникулаш лоацъяр ерригача паччахьалкхен пайда болаш хIама да.
И Айюбов
№ 7 (12142), шинара, 22 январь, 2019 шу / вторник, 22 января 2019 года